Logo

Friends Added

អប់រំ

ផ្សារ​មូលបត្រ​កម្ពុជា ​នឹង​ចាប់​បើកទ្វារ ​នៅ​ថ្ងៃទី១១​កក្កដា​

ផ្សារ​មូលបត្រ​កម្ពុជា​នឹង​បើកទ្វារ​ នៅថ្ងៃ​ទី១១​កក្កដា២០០១​នេះ​ហើយ ​តាម​ការ​គ្រោងទុក មាន​ភាគហ៊ុន​ក្រុមហ៊ុន​របស់​រដ្ឋ​ចំនួន​២​ នឹង​ចាប់ផ្តើម​​លក់ដូរ នៅក្នុង​ទីផ្សារ​នេះ គឺ​ទូរគមនាគមន៍​កម្ពុជា ​និង​រដ្ឋាករ​ទឹក​ស្វយ័ត​ភ្នំពេញ នេះបើតាមលោកគាត ឈន់​ថ្លែង​យ៉ាងនេះ​ នៅក្នុង​ពិធី​សម្ពោធ​ក្រុមហ៊ុន​ មូលបត្រ​ SONATRA​ ដែល​នឹង​ក្លាយ​ជា​ក្រុមហ៊ុន​ឈ្មួញ​ជើងសា​មូលបត្រ​ ថ្ងៃទី០៧កក្កដានេះ។

ក្រៅ​ពី​នោះ គណៈកម្មការមូលបត្រ​កម្ពុជា​ ក៏​បាន​ប្រកាស​ទទួលស្គាល់​ភ្នាក់ងារ​ទូទាត់​ សាច់ប្រាក់ ភ្នាក់ងារ​បញ្ជីការ​មូលបត្រ ភ្នាក់ងារ​ចុះ​បញ្ជី​ផ្ទេរ​មូលបត្រ​ជាដើម ដែល​ភ្នាក់ងារ​ទាំងនេះ​គឺ​សុទ្ធ​តែ​ជា​ស្ថាប័ន​ធនាគារធំៗ​នៅ​កម្ពុជា៕

រហូត​ដល់​ពេល​នេះ​ មាន​ក្រុមហ៊ុន​ឈ្មូញ​ជើងសា​មូលបត្រ​ចំនួន​៤​ ដែល​បាន​ទទួល​អាជ្ញាបណ្ណ​ពី​គណៈកម្មការ​មូលបត្រកម្ពុជា ​ដើម្បី​ប្រតិបត្តិការ​នៅក្នុង​ដំណើរការ​ទីផ្សារ​ហ៊ុន។

អតិផរណា​ នៅកម្ពុជា មានកំណើន​​ ជាង​៦​%

តាម​តួ​លេខ​ថ្មី​បំផុត​ទទួល​បាន​ពី​វិទ្យា​ស្ថាន​ជាតិ​ស្ថិតិ (NIS) នៅថ្ងៃទី០៦ កក្កដានេះ បានបង្ហាញ​ថា សន្ទស្សន៍​ថ្លៃ​ទំនិញ​ប្រើ​ប្រាស់​ (CPI​) នៅ​កម្ពុជា នៅ​តែ​បន្ត​កើន​ឡើង​ឥត​ឈប់​រហូត​ដល់៦.៥​ភាគ​រយ​នៅ​ខែ​ឧសភា ឆ្នាំ​២០១១នេះ។ លោក Suzuki Hiroshi សេដ្ឋកិច្ច​វិទូ និង​ជា​ប្រធាន​នាយក​ប្រតិបត្តិ​របស់​វិទ្យា​ស្ថាន​ស្រាវ​ជ្រាវ​ពាណិជ្ជកម្ម​ នៅ​កម្ពុជា (BRIC) ​ឲ្យ​ដឹង​ថា នៅ​ប្រទេស​ចិន ឥណ្ឌា និង​វៀត​ណាម រដ្ឋាភិបាល​ បាន​ចាប់​ផ្តើម​ចាត់​វិធាន​ការ​បន្ទាន់ដើម្បី​ទប់​ស្កាត់​​​និងបន្ទាបអតិផរណា​នេះ។

លោក​បន្ត​​ថា​៖ កម្ពុជានៅ​មាន​ចន្លោះ​ទំនេរ និង​​ពេល​​សម្រាប់​ចាប់​ផ្តើម​អនុវត្ត​វិធាន​ការ​ដូច​គ្នា​នេះ ដើម្បី​បង្វែរ​ទិស​ដៅ​​គោល​នយោ​បាយ​។លោក Suzuki Hiroshi​​ បន្ថែម​​​ថា ខ្ញុំ​មាន​ការ​បារម្ភ​ ដោយ​សារ​អតិផរណា​តម្លៃ​ម្ហូប​អាហារ ជា​កត្តា​ធ្វើ​ឲ្យ​អតិផរណា​
កើន​ឡើង​។

លោក​ក៏បានគូស​បញ្ជាក់​ដែរ​ថា តម្លៃ​ប្រេង ដែល​ជា​កត្តា​ចម្បង​ធ្វើ​ឲ្យ​អតិផរណា​កើន​ឡើង​ ចាប់​ផ្តើម​ធ្លាក់​ចុះ បន្ទាប់​ពី​តម្លៃ​ប្រេងនៅ​លើ​ទី​ផ្សារ​អន្តរជាតិ បាន​ធ្លាក់​ចុះ​។ តម្លៃ​ប្រេង​នៅ​ទី​ក្រុង​ញូវ​យ៉ក បាន​ឡើង​ថ្លៃ​ខ្ពស់​ជាង១១០​ដុល្លារ​ ក្នុង​​មួយ​ធុង​,​តែបច្ចុប្បន្ន​បាន​​ធ្លាក់​ចុះ​មក​នៅ​ត្រឹម​៩០​ដុល្លារ​​។

លោក Suzuki Hiroshi បាន​ឲ្យ​​ដឹង​ទៀត​ថា នៅ​កម្ពុជា ដោយ​​សារ​តែ​ដុល្លារូបនីយកម្ម ដូច្នេះ​​មិន​មាន​វិធាន​ការ
គោល​នយោបាយ​គ្រប់​គ្រាន់ ដើម្បី​បន្ទាប​អតិផរណា​ឡើយ។ ប្រការ​ចាំ​បាច់ គឺ​ត្រូវ​តាម​ដាន​ដំណើរ​ការ​វិវត្តរបស់​តម្លៃ​អង្ករ

ការចរាចរណ៍ ទំនិញ​តាម​កំពង់​ផែ ​ភ្នំពេញ​​ ​កើន​ឡើង​ ជាង​៣០%

ការ​ធ្វើ​ចរាចរណ៍​ទំនិញ​ឆ្លង​តាត់​តាម​កំពង់​ផែស្វយ័ត​ភ្នំពេញ​ (PPAP) នៅ​ឆមាស​ទី​មួយ​
ឆ្នាំ​២០១១នេះ​ បាន​កើន​ឡើង​ជាង​​៣០​​ភាគរយ​ បើ​ធៀប​នឹង​រយៈ​ពេល​​ដូច​គ្នា​កាល​ពី​ឆ្នាំ​ទៅ។
ទិន្ន​ន័យ​ជា​ផ្លូវ​ការ​​ទទួល​បាន​ពី PPAP បាន​បង្ហាញ​ថាទំនិញ​ដឹក​ចេញ​​ចូល​តាម​កំពង់​ផែ​
នេះ​​សរុប​​​មាន​​​ចំនួន​៣៥ ១៤៩​ធីអីយូ(កុងតាន័រ)​ ចាប់​ពី​​ខែ​មករា រហូត​ដល់​ខែ​មិថុនា បើធៀបនឹងឆមាស​ទីមួយ
​ឆ្នាំ​មុន ​មាន​២៦ ៧៩០​​ធីអ៊ីយូ​។

លោក អ៊ាង វ៉េង​ស៊ុន ប្រធាន​ពាណិជ្ជ​កម្ម​នៅ PPAP បាន​ឲ្យ​ដឹង​ថា ទំនាក់​ទំនង​​ដ៏​ធំ​រវាង​ PPAP
និង​កំពង់​ផែ Cai Met របស់​វៀត​ណាម ជា​កត្តា​ជំរុញ​​ឲ្យ​ការ​ដឹក​ជញ្ជូន​រីក​ចម្រើន។ លោក​​បន្ត​​ថា
Cai Met មាន​ទំនាក់​​ទំនង​​ផ្ទាល់​​ទៅ​នឹង​សហ​ភាព​អឺរ៉ុប​ យើង​បាន​កែ​លម្អ​​កំពង់​ផែ​របស់​យើង
តាម​រយៈ​ការ​បើក​បណ្តាញ​​ថ្មី​ៗ​មួយ​ចំនួន ជា​មួយ​កំពង់​​ផែ ​Cai Met របស់​វៀតណាម ដូច្នេះ​យើង​អាច
​ផ្តល់​សេវា​​ឲ្យ​កាន់​តែ​ប្រសើរ និង​មាន​តម្លៃ​សម​ស្រប ខណៈ​ពេល​ដែល​​ក្រុម​ហ៊ុន​ជា​ច្រើន បាន​នាំ​
ចេញ​ទំនិញ​របស់​ខ្លួន ទៅ​កាន់ EU ដូច្នេះ​បច្ចុប្បន្ន ក្រុម​ហ៊ុន​ទាំង​នោះ ងាយ​ស្រួល​​ក្នុង​ការ​ប្រើ​ប្រាស់
​កំពង់​ផែ​យើង​។

ទិន្ន​ន័យ​របស់​​ក្រសួង​ពាណិជ្ជ​កម្ម​​បាន​បង្ហាញ​ថា​ កម្ពុជា​បាន​នាំ​​ចេញ​អង្ករ ៤២ ៦៦៩​តោន
ក្នុង​រយៈ​ពេល​​​៤​ខែ​ដំបូង​ឆ្នាំ​នេះ បើ​ធៀប​​នឹង​​រយៈ​ពេល​ដូច​គ្នា ឆ្នាំ​មុន ដែល​មាន​ត្រឹម​តែ ២១ ៣២២​តោន
ខណៈ​ពេល​ដែល​ការ​នាំ​ចេញ​សម្លៀក​បំពាក់ និង​វាយនភណ្ឌ​​បាន​កើន​ឡើង​ជាង ២៧​ភាគ​រយ ក្នុង​រយៈ​
ពេល ៥​ខែ​ដំបូង ឆ្នាំ​២០១១​នេះ​។

លោក អ៊ាង វ៉េង​ស៊ុន បានបន្ត​ឲ្យ​ដឹង​ថា ថ្មី​ៗ​នេះ​កំពង់​ផែ​នេះ អាច​ដឹក​ជញ្ជូន​បាន​ប្រហែល ៧​ពាន់​ធីអ៊ីយូ​ក្នុង​មួយ​ខែ៕

កម្ពុជា ផ្តើមបើកការដ្ឋាន សាងសង់ស្ពានថ្មី នៅក្រុងតាខ្មៅ​

ស្ពាន​ថ្មី ឆ្លងកាត់​ទន្លេ​បាសាក់ នៅ​ក្រុង​តាខ្មៅ ខេត្ត​កណ្តាល នឹង​ត្រូវ​បើក​ការដ្ឋាន​សាងសង់ នា​ព្រឹក​ថ្ងៃទី​៦​កក្កដា ឆ្នាំ​២០១១ ក្រោម​អធិបតីភាព​ដ៏​ខ្ពង់ខ្ពស់​របស់​សម្តេច​តេជោ ហ៊ុន សែន​​ ហើោយស្ពានបេតុង​ថ្មីមាន​ប្រវែងសរុប ៨៥៥ ម៉ែត្រ និងទទឹងប្រវែង ១៣,៥ ម៉ែត្រ ដោយ​ប្រើប្រាស់​ប្រាក់​កម្ចី​សម្បទាន​របស់​ប្រទេស​ចិន​ប្រមាណ៣២.៨៩លានដុល្លាសហរដ្ឋអាមេរិក។

ស្ពាន​ថ្មី​នោះ ស្ថិតនៅក្នុង​ភូមិ​ព្រែក​សំរោង សង្កាត់​តាខ្មៅ ក្រុង​តាខ្មៅ ដែល​ត​ភ្ជាប់​ពី​ផ្លូវជាតិ​លេខ ២១ អា នៅ​ត្រើយ​ខាងលិច ឆ្ពោះទៅ​កាន់​ផ្លូវ​ជាតិ​លេខ ១១០ នៅ​ត្រើយ​ខាងកើត​។

​ប្រទេស​ចិន បាន​ផ្តល់​ប្រាក់​កម្ចី​សម្បទាន​ជាច្រើន​លាន​ដុល្លារ ដល់​កម្ពុជា ដើម្បី​សាងសង់​ផ្លូវ និង​ស្ពាន​ក្នុងនោះ រួមមាន ស្ពាន​ព្រែក​ក្តាម ឆ្លងកាត់​ដៃ​ទន្លេសាប និង​ស្ពាន​ព្រែក​តា​មាក់ ឆ្លងកាត់​ទន្លេមេគង្គ ជាដើម​។ ចិន​ក៏​បាន​ព្រមព្រៀង​ផ្តល់​ប្រាក់​កម្ចី ដើម្បី​សាងសង់​ស្ពាន​ជ្រោយចង្វារ​ទី​២ ដែល​គ្រោង​នឹង​បើក​ការដ្ឋានសាងសង់ នៅថ្ងៃទី២វិច្ឆិកា ឆ្នាំ​២០១១៕

រដ្ឋាភិបាលកម្ពុជា ​ចេញវិធានការក្តៅ ការចំណាយខ្ជះខ្ជាយ ​របស់ក្រសួងស្ថា​ប័នរដ្ឋ​

ប្រមុខរាជរដ្ឋាភិបាលកម្ពុជា បានចាត់វិធានការរឹតបន្តឹង នូវការចំណាយខ្ជះខ្ជាយ នៅបណ្តា​ក្រសួងស្ថា​ប័ន និងមន្ទីរជំនាញរាជធានី ខេត្ត របស់រដ្ឋ​ទៅលើសោហ៊ុយចំណាយ​អចិន្ត្រៃយ៍ ដូចជា​ ទូរស័ព្ទ អគ្គិសនី ទឹក សម្ភារៈការិយាល័យ ប្រេងឥន្ធនៈ និងការ​ទទួល​ភ្ញៀវ​ជា​ដើម។

ក្នុងសារាចរណែនាំ ស្តីពីការរៀបចំសេចក្តីព្រាងច្បាប់ ស្តីពីហិរញ្ញ​វត្ថុ​សម្រាប់ការគ្រប់គ្រងឆ្នាំ ២០១២ របស់​រាជរដ្ឋាភិបាលដែល​ធ្វើនៅថ្ងៃទី១៣ ខែមិថុនា ឆ្នាំ២០១១ ដែលចុះ ហត្ថ​លេខាដោយ សម្តេចតេជោ ហ៊ុនសែន នៅត្រង់ទំព័រទី១៧ បានឲ្យដឹងថា​“កន្លង​មក ចំណាយ ​សម្រាប់​មុខសញ្ញា​អគ្គិសនី ទូរស័ព្ទ ទឹក ប្រេងឥន្ធនៈនិងការទទួលភ្ញៀវ​មានលក្ខណៈខ្ជះខ្ជាយ ។ ចំណាយសម្រាប់សញ្ញា ទាំងនេះចេះតែកើន​ឡើង​ហើយការទូទាត់មិនបាន​ទាន់ពេល​វេលា​ដែល​នាំឲ្យមានបំណុល​​កកស្ទះពី មួយឆ្នាំទៅមួយឆ្នាំ។

ដើម្បីដោះស្រាយបញ្ហានេះ ចំពោះចំណាយអគ្គីសនី ទូរស័ព្ទ និងទឹក ត្រូវអនុវត្ត​នូវវិធាន​ការ​ដូច​ជា ១. ក្រសួងសេដ្ឋកិច្ច និងហរិញ្ញវត្ថុ និងក្រសួង ស្ថាប័នទាំងអស់ត្រូវ​សហការត្រួត​ពិនិត្យ​លើ​ការប្រើប្រាស់ បច្ចុប្បន្ន ដើម្បីរៀបចំយន្តការ និងប្រព័ន្ធគ្រប់គ្រង​ការប្រើប្រាស់​អគ្គិសនី ទូរស័ព្ទ និងទឹកឲ្យបានត្រឹមត្រូវ ហ្មត់ចត់ និងប្រកបដោយប្រសិទ្ធភាព, ២. ក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័នទាំងអស់​ត្រូវ
សហការគ្រោងឥណទាន សម្រាប់ អគ្គិសនី ទូរស័ព្ទ និងទឹក ប្រកបដោយភាពសន្សំ​សំចៃ​ខ្ពស់ និង ៣. ក្រសួងប្រៃសណីយ៍ និងទូរគមនាគមន៍ អគ្គិសនីកម្ពុជា រដ្ឋាករ​ទឹកស្វយ័ត និងក្រុម​ហ៊ុន​ផ្តល់សេវាទូរស័ព្ទ ត្រូវផ្តល់វិក្កយបត្រប្រចាំខែនីមួយៗ​ឲ្យបានមុនថ្ងៃទី១៥នៃខែ បន្ទាប់។

ជំនួយរបស់ជប៉ុន លើកនេះ ផ្តោតសំខាន់ លើកសិករខ្មែរ

​នៅ​ថ្ងៃ​ទី​៤ ខែ​កក្កដា ឆ្នាំ​២០១១ ប្រទេស​ជប៉ុន បាន​ប្រកាស​ផ្ដល់​ជំនួយ​ឥត​សំណង​ចំនួន ២៩០​លាន​យ៉េន ស្មើ​និង ៣,៥៨​លាន​ដុល្លារ​អាមេរិក មក​ឲ្យ​ប្រទេស​កម្ពុជា ដើម្បី​ទិញ​ជី​កសិកម្ម ដែល​មាន​គុណ​ភាព​ខ្ពស់ សម្រាប់​លក់​ក្នុង​តម្លៃ​ថោក ទៅ​ឲ្យ​កសិករ​ខ្មែរ​ច្រើន​ពាន់​គ្រួសារ​នៅ​ក្នុង​ខេត្ត​ចំនួន​១៣ នៅ​កម្ពុជា ក្នុង​នោះ​មាន​ខេត្ត​បន្ទាយ​មានជ័យ បាត់ដំបង កំពង់ចាម កំពង់ឆ្នាំង កំពង់ស្ពឺ កំពង់ធំ កំពត កណ្ដាល ព្រៃវែង ពោធិ៍សាត់ សៀមរាប ស្វាយរៀង និង​តាកែវ។

ជំនួយ​នេះ ត្រូវ​បាន​ចុះ​ហត្ថ​លេខា​ជា​ផ្លូវ​ការ​រវាង​រដ្ឋ​មន្ត្រី​ក្រសួង​ការ​បរទេស​កម្ពុជា លោក ហោ ណាំហុង ជា​មួយ​ឯក​អគ្គ​រាជ​ទូត​ជប៉ុន​នៅ​កម្ពុជា គឺ​លោក ម៉ាសាហ៊្វូមី គូរ៉ូគី (Masafumi Kuroki) នៅ​ឯ​ក្រសួង​ការ​បរទេស​កម្ពុជា នៅ​ថ្ងៃ​ទី​៤ ខែ​កក្កដា ឆ្នាំ​២០១១។

ប្រទេស​កម្ពុជា​បាន​ទទួល​ជំនួយ​ឥតសំណង ពី​ប្រទេស​ជប៉ុន​ ចំនួន​សរុប ៣៥​លាន ៧​សែន និង​៧​ម៉ឺន​ដុល្លារ​អាមេរិក តាំង​ពី​ឆ្នាំ​១៩៩២មក។ ប្រទេស​កម្ពុជា​ មាន​ផែនការ​នាំ​អង្ករ​ចេញ​ ទៅ​លក់​នៅ​ទីផ្សារ​បរទេស ឲ្យ​បាន ១​លាន​តោន​នៅ​ឆ្នាំ​២០១៥៕

​​កម្ពុជា នឹង​មានការផលិត​អង្ករ​​ នាំ​ចេញច្រើន

ក្នុង​ដំណើរ​ទស្សនកិច្ច​របស់​នាយក​រដ្ឋ​មន្ត្រី​បារាំង លោក ហ្រ្វង់ស្វ័រ ហ្វីយ៉ុង (Francois Fillon) នៅ​កម្ពុជា លោក​បាន​សន្យា ​ជា​មួយ​នាយក​រដ្ឋ​មន្ត្រី​កម្ពុជា​ថា រដ្ឋាភិបាល​បារាំង​នឹង​ផ្ដល់​ទឹក​ប្រាក់​ប្រមាណ​ជាង ២០​លាន​អឺរ៉ូ អាច​ស្មើ​នឹង ២៨​លាន​ដុល្លារ​អាមេរិក ដល់​រដ្ឋាភិបាល​កម្ពុជា ដើម្បី​ជួយ​ជំរុញ​លើ​គម្រោង​វិនិយោគ​លើ​ការ​ផលិត​អង្ករ​នាំ​ចេញ​របស់​រដ្ឋាភិបាល​កម្ពុជា ក្នុង​ទិសដៅ​ពី​ឆ្នាំ​២០១១ ដល់​ឆ្នាំ​២០១៥ ឲ្យ​បាន​ទទួល​ជោគជ័យ។

សេចក្ដី​ប្រកាស​ព័ត៌មាន​ពី​ស្ថាន​ទូត​បារាំង​ប្រចាំ​នៅ​កម្ពុជា បាន​ឲ្យ​ដឹក​ថា ក្នុង​រយៈ​ពេល ៣​ឆ្នាំ​ចុង​ក្រោយ​នេះ ជំនួយ​ដល់​ការ​អភិវឌ្ឍ​ដែល​ប្រទេស​បារាំង​បាន​ផ្ដល់​ជូន​ប្រទេស​កម្ពុជា​ក្នុង​លក្ខណៈ​ទ្វេភាគី និង​ពហុ​ភាគី មាន​ចំនួន​ទឹក​ប្រាក់​ប្រមាណ​ជា ២៥​លាន​អឺរ៉ូ ស្មើ​នឹង​៣៦​លាន​ដុល្លារ​អាមេរិក​ក្នុង​មួយ​ឆ្នាំ។

ប្រទេស​បារាំង​ក៏​បាន​ផ្តល់ថវិការជួយ​ទ្រទ្រង់​ដល់​សាលាក្ដី​ខ្មែរ​ក្រហម ដែល​មាន​ទឹក​ប្រាក់​ជំនួយ​សរុប​ចំនួន​ជាង ៧​លាន​អឺរ៉ូ ស្មើ​ប្រមាណ ១០​លាន​ដុល្លារ​អាមេរិក​ផងដែរ។

​ចាប់​តាំង​ពី​ឆ្នាំ​១៩៩១មក ជំនួយ​ពី​ប្រទេស​បារាំង​ចំពោះ​បេតិកភណ្ឌ​អង្គរ រួម​បញ្ចូល​ទាំង​កម្មវិធី​បណ្ដុះ​បណ្ដាល ​មាន​ប្រមាណ​ជាង ២១​អឺរ៉ូ អាច​ស្មើ​នឹង​៣០​លាន​ដុល្លារ។ ពាណិជ្ជកម្ម​ទ្វេភាគីរវាងកម្ពុជា និង​បារាំង កាល​ពី​ឆ្នាំ​២០១០កន្លង​ទៅ មាន​ទឹក​ប្រាក់​ប្រហែល​ជាង ២០០​លាន​ដុល្លារ​សហ​រដ្ឋ​អាមេរិក៕

ធនាគារ​អភិវឌ្ឍន៍​អាស៊ី ​​ផ្តល់​១​លាន​ដុល្លារ​ ដល់កម្ពុជា

ថ្ងៃ​ចន្ទ​ទី​៤​ កក្កដា​២០១១ធនាគារ​អភិវឌ្ឍន៍​អាស៊ី​ ADB​ បានប្រកាស​ផ្តល់​ជំនួយ​ហិរញ្ញ​វត្ថុ​១លានដុល្លារ
ដល់​កម្ពុជា ​សម្រាប់​ធ្វើ​ការ​សិក្សា​លទ្ធភាព​អនុវត្ត​និង​បង្កើត​នូវ​ ផែនការ​រៀបចំ​គម្រោង​ស្តារ​
ផ្លូវ​គមនាគមន៍។​

ថវិកា​​ទាំងនោះ​​​ ត្រូវ​​ប្រើ​​ប្រាស់​​ដោយ​ក្រសួង​សាធារណការ​ និង​ដឹក​ជញ្ជូន​​ដើម្បី​ស្តារ​​
ឡើង​វិញនូវ​ផ្លូវ​មួយ​ចំនួន ​ដែលមានប្រវែង​១៥០​គី​ឡូ​ម៉ែត្រ​ ​ក្នុង​ខេត្តព្រៃវែង ស្វាយរៀង កំពង់ឆ្នាំង
និងខេត្តកំពង់ស្ពឺ។

លោក​ស៊ីហ៊ីរុ ដេត អ្នក​ឯកទេស​ជាន់ខ្ពស់​ផ្នែក​គមនាគមន៍​របស់​AD​B បាន​ថ្លែងថា សេដ្ឋកិច្ច​ជនបទ​
នៅក្នុង​ប្រទេស​កម្ពុជា ​កាន់តែ​ពឹង​អាស្រ័យ​ខ្លាំងឡើងៗ ​លើ​បណ្តាញ​ផ្លូវថ្នល់​ ដែល​មាន​ភាព​ល្អប្រសើរ។
ប៉ុន្តែ​ផ្លូវខេត្ត និង​ផ្លូវជនបទ​ នៅបន្ត​ទទួលរង​ខូចខាត ដោយសារ​កំណើន​ចរាចរណ៍​យ៉ាង​ឆាប់​រហ័ស​
និង​រថយន្ត​ដឹកទំនិញ​ធ្ងន់ៗ៕

កម្ពុជា​​​​ ទទួល​បាន​​​កំណើន សេដ្ឋកិច្ច​​​លំដាប់​លេខ​​​២ ក្នុងតំបន់អាស៊ាន ​​

រាជធានីភ្នំពេញៈ ​​ការ​​រីកចម្រើន​​​​ ឬ​ការ​​​ងើបឡើងវិញ នៃ​​ GDP
(ផលិត​​ផល​​​សរុប​ក្នុង​ស្រុក​) ​ប្រទេសនៅ​តំបន់​អាស៊ាន ​​ប្រទេស​កម្ពុជា​​​​ទទួល​បាន​​​ចំណាត់ថ្នាក់​​លេខ​​​២ ដោយផ្អែក​​តាមរបាយការណ៍​​​របស់មូលនិធិរូបិយវត្ថុអន្តរជាតិ​​​ (IMF) និង ធនាគារពិភពលោក(WB) ឲ្យដឹងនៅថ្ងៃចន្ទ ទី៤ ខែកក្កដា​ ២០១១នេះ​​។

យោងតាមIMF និង WB ឱ្យ​​ដឹងបន្ត​​ថា សម្រាប់​​​​ប្រទេស​អាស៊ាន​​​ដែលមាន GDP ងើប​ខ្លាំងជាង​
គេ​​​គឺប្រទេស​​​​​សាំងហ្គាពួរ ឡើង​​ដល់​​៨,៣ភាគរយ ឥណ្ឌូនេស៊ី​​៦,៥ភាគរយ វៀត​ណាម​​៥,៤ភាគរយ ហ្វីលីពីន​៤,៩ភាគរយ ​ថៃធ្លាក់​មក
​​នៅត្រឹម​​​៣,០០ភាគរយ​​។

សម្រាប់​​ប្រទេស​កម្ពុជា​យើង​​​​ ធនាគារ​​​ពិភពលោក និង​មូលនិ​ធិរូបិយ​វត្ថុ​​​អន្តរជាតិ ​​បានធ្វើ​ការ​​ទស្សន៍​​ទាយ​​ថា អាចមានកំណើន​​​រង្វង់​​​​៦,៧ ទៅ​៦,៩ភាគរយ នឹង​អាច​ងើប​ឡើង​ដល់​​​៧,០០ភាគរយ។ ​ដូច្នេះ​បើ GDPប្រចាំ​ឆ្នាំ​​​​​ ក្នុងរង្វង់​​​៧,០០ភាគរយ​ មាន​ន័យ​ថា កម្ពុជា ​​អាច​បានកំណើន សេដ្ឋកិច្ច​​​ប្រចាំ​ត្រីមាស​ ចំណាត់ថ្នាក់​​​​លេខ​​២​​​ បន្ទាប់ពី​ប្រទេសសាំង​ហ្គាពួរ៕