Logo

Friends Added

ព្រឹត្តិការណ៍

បារាំង​ មានគម្រោងឧបត្ថម្ភថវិកា ២០លានយូរ៉ូ​ ដល់កម្ពុជា

ប្រទេសបារាំង មានគម្រោងជួយឧបត្ថម្ភថវិកា ចំនួន២០លានយូរ៉ូ នៅក្នុងឆ្នាំ២០១២ ដើម្បីធ្វើរោងចក្រផលិតនិងកែច្នៃអង្ករ យកទៅលក់នៅទីផ្សារអន្ដរជាតិ នេះបើយោង​តាម​​ការអះអាង របស់លោក អ៊ុច ប៊ូរិទ្ធ​ រដ្ឋលេខាធិការ ក្រសួងការបរទេស។

យោងតាមប្រសាសន៍លោក អ៊ុច ប៊ូរិទ្ធ បាន​ឲ្យដឹងថា​កិច្ចជំនួបពិភាក្សាទ្វេភាគី ប្រហែល​មួយម៉ោង រវាងសម្ដេចតេជោហ៊ុន សែន និងនាយករដ្ឋមន្ដ្រីបារាំង លោកហ្វ្រង់ស្វ័រ ហ្វីយ៉ុង នៅរសៀល ថ្ងៃទី២ ខែកក្កដា ឆ្នាំ២០១១ នៅឯវិមាន សន្ដិភាព លោកហ្វ្រងស្វ័រ ហ្វីយ៉ុង បានជំរុញឱ្យកម្ពុជា ផលិតនូវរោងចក្រ សម្រាប់កែច្នៃអង្ករ ដើម្បី​​យកទៅ​លក់ នៅទីផ្សារ​អន្ដរជាតិ ហើយប្រទេសបារាំង នឹងជួយជ្រុមជ្រែង​ព្រមទាំងនឹងធ្វើការវិនិយោគនូវទឹក​​ប្រាក់​ ​ប្រមាណ ជិត៣០លានដុល្លារ សហរដ្ឋអាមេរិកផងដែរ ​សម្រាប់ធ្វើរោងចក្រ​កែច្នៃអង្ករនោះ។

លោកហ្វ្រង់ស្វ័រ ហ្វីយ៉ុង បានមានប្រសាសន៍ថា ប្រទេសបារាំងគាំទ្រ យ៉ាងពេញទំហឹង ចំពោះបេក្ខភាពប្រទេសកម្ពុជា ជាសមាជិកមិនអចិន្ដ្រៃយ៍នោះ នៅក្នុងក្រុមប្រឹក្សាសន្ដិសុខ អង្គការសហប្រជាជាតិ។ មន្ដ្រីរូបនេះ បានបន្ថែមថា ដំណើរ​ទស្សនកិច្ច របស់នាយករដ្ឋមន្ដ្រីបារាំង លោកហ្វ្រង់ស្វ័រ ហ្វីយ៉ុងនេះក៏បាននាំអ្នកវិនិយោគធំៗ របស់ប្រទេសបារាំង ដើម្បី​ឱ្យមកធ្វើការវិនិយោគ នៅប្រទេសកម្ពុជា ជាច្រើនវិស័យ ហើយពិសេសជាងគេនោះ ផ្នែកខាងវិស័យកសិកម្ម ។

គណបក្សភឿថៃ ឈ្នះឆ្នោត​ដាច់ គណបក្សប្រជាធិបតេយ្យ

យោងតាមការរាប់សន្លឹកឆ្លោតរបស់គណៈកម្មការជាតិបោះឆ្នោត នៅក្នុងប្រទេស​សៀមជាជំហានដំបូង នៅថ្ងៃទី០៣ កក្កដាបានឲ្យដឹងថា ស្ទើរតែគ្រប់ខេត្ត គណបក្ស​ភឿថៃ​​របស់លោក​ស្រីយីងឡាក់ បាននាំមុខគណបក្សប្រជាធិបតេយ្យ របស់អាប់ភីស៊ីត។

ក្រោយមកតាមការផ្សាយ របស់ទូរទស្សន៍ប៉ុស្តិ៍លេខ៣ របស់ថៃ បានបង្ហាញ ឲ្យឃើញថា លទ្ធផល បណ្តោះអាសន្ន ចុងក្រោយ ដូចតទៅ៖ គណបក្សភឿថៃ ទទួលបាន ៣១៣អាសនៈ គណបក្សប្រជាធិបតេយ្យ ទទួលបាន១៥២អាសនៈ គណបក្សភូមិចៃថៃ ទទួល​បាន ១៣អាសនៈ គណបក្ស ឆាតថៃបាតតាណា ទទួលបាន១០អាសនៈ គណបក្ស​ផ្លាងឈុន ទទួលបាន ៥អាសនៈ គណបក្ស រ៉ាក់ប្រទេសថៃ ទទួលបាន ៣អាសនៈគណបក្ស ជាតិផាត់តាណា ភឿផានឌីន ទទួលបាន ២អាសនៈ គណបក្ស រ៉ាក់សន់តិ ទទួលបាន ១អាសនៈ និង គណបក្ស មាតុភូមិ ទទួលបាន ១អាសនៈ។

ដើម្បី​បង្កើត​រដ្ឋាភិបាល​ថៃថ្មីបាន គណបក្សនីមួយៗ ​ត្រូវការ​សំឡេង​យ៉ាងតិច ២៥១ នៅ​ក្នុង​រដ្ឋសភា។ ប្រសិន​បើ​លទ្ធផល​ផ្លូវការ ពិតជាដូច​លទ្ធផល​ នៃ​ការ​ស្ទាបស្ទង់មតិ​ថ្ងៃនេះ​មែន គណបក្ស​ភឿថៃ​នឹង​អាច​បង្កើត​រដ្ឋាភិបាល ​តែ​ម្នាក់ឯងបាន ហើយ​ថៃ​នឹង​មាន​នាយករដ្ឋមន្រ្តី​ស្រី​ គឺលោកស្រី យីងឡាក់ ជាលើក​ដំបូង​ក្នុង​ប្រវត្តិសាស្រ្ត៕

ទារិកាចម្លែក មាននិស្ស័យសេ្នហ៍ ជាមួយពស់ថ្លាន់

នៅថ្ងៃទី៣០ មិថុនានេះ ស្ថិតក្នុងភូមិក្បាលស្ពាន ចំណុចក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានទារិកាចម្លែកម្នាក់ កើតបានមួយយប់ ត្រូវបាន​ពស់ថ្លាន់ មួយក្បាលមកដេកជាមួយ​បើទោះបីឪពុកក្មេងនោះ ចាប់ពស់ នោះចោលឆ្ងាយ ក៏ដោយធ្វើអោយប្រជាពលរដ្ឋនាំគ្នា មកចោមរោមមើល យ៉ាងកុះករ។​

ទារិកានោះ មានឪពុកឈ្មោះ សន ភ័ក្រ អាយុ២១ឆ្នាំ និងម្តាយឈ្មោះ ខន សុខាអាយុ១៨ឆ្នាំ។​ ឪពុកម្តាយទារិកា មានកូនក្នុងបន្ទុក២នាក់ ឯទារិកានេះ ទើបកើតបាន៣ថ្ងៃ គិតត្រឹមថ្ងៃកើតហេតុ។ ឪពុកទារិកាបន្តថា ភ្លាមនោះគាត់នឹងភរិយាមាន ការភិត​ភ័យយ៉ាងខ្លាំងហើយគាត់ក៏បានរត់ចេញមកក្រៅផ្ទះ មកជួយចាប់ពស់នោះចេញ។

ក្រោយមកគាត់បានយកពស់ថ្លាន់នោះ ទៅព្រលែង ស្រាប់តែមិនដល់មួយម៉ោងផង ស្រាប់តែកូនរបស់លោកយំ ហើយឃើញពស់ថ្លាន់ នោះវៀមកដេកជាមួយកូនស្រី ហើយថែមទាំងថើប ថ្ពាល់កូនគាត់​រហូតដល់បាត់យំ ភ្លាមនោះម្ដាយក្មេករបស់គាត់បានមកហៅ គេឯងនោះ ចាប់ពស់ចេញ​ព្រោះខ្លាចខាំ​ចៅរបស់គាត់ ។

ប៉ុន្តែពេលអ្នកស្រុកមកមើល ទើបអ្នកខ្លះស្គាល់ថា ជាពស់ថ្លាន់ក៏ចាប់យកមក ដាក់ចុង កន្ទេលស្រាប់តែ កូនពស់ថ្លាន់នោះ លូនឡើងទៅលិទ្ធថ្ពាល់ ទារិកាទៅវិញ ហើយថែមទាំង ឡើងទៅរុំព័ទ្ធដេកក្បែរ ទារិកានោះទៀតផង។

តាមការឱ្យដឹងពីអ៊ុំ ស្រី ប៊ុត ផល ជាជីដូនរបស់ទារិកា បានឱ្យដឹងថា ក្រោយពីបានឃើញហេតុការណ៍នេះ គាត់ក៏បាន​ឱ្យគ្រូទាយមើល តើក្រុមគ្រួសាររបស់គាត់មាន រឿងអ្វីបានជាកើតរឿងចម្លែកបែបនេះ ។ ពេលនោះគ្រូទាយបាន​​និយាយថា ពស់ថ្លាន់ នេះជាប្ដីរបស់ទារិកា កាលពីជាតិមុន ។ ហើយពស់ថ្លាន់នេះ បានមកផ្ទះទារិកានេះមុន៣ថ្ងៃ សូមថែរក្សាពស់នេះឱ្យបានល្អ ៕

ស្ដុកឈើខុសច្បាប់ នៅផ្ទះ​ ត្រូវអាជ្ញាធរ វែកមុខ

ថ្ងៃទី២៩ ខែមិថុនា ឆ្នាំ២០១១ កម្លាំងចម្រុះរបស់ ខេត្ដកំពត រួមមានកម្លាំង​រដ្ឋបាល​ព្រៃឈើកម្លាំង​នគរបាលមូលដ្ឋាន កម្លាំងកងរាជអាវុធហត្ថ ដែលដឹកនាំដោយ ព្រះរាជអាជ្ញារងអម​សាលាដំបូងខេត្ដកំពត លោក សៀង សុខ បានចុះបង្ក្រាប​​កន្លែងស្ដុកឈើខុសច្បាប់ នៅផ្ទះប្រធានទីស្នាក់ការ​ស្រាវជ្រាវ​ចារកិច្ចយោធា អគ្គបញ្ជាការ ប្រចាំខេត្ដកំពត លោក លឹម ឆាយវ៉ារ៉ាត់ ដែលស្ថិតនៅក្នុង​​ភូមិ​​ត្រញំងធំ ឃុំត្រពាំងធំ ស្រុកទឹកឈូ ខេត្តកំពត។

ប្រភពព័ត៌មានពីកម្លាំងចម្រុះ​ដែលបានចូលរួមក្នុងប្រតិបត្ដិការ​បង្ក្រាបកន្លែងស្ដុកឈើ ខុសច្បាប់ខាងលើនេះបានឱ្យដឹងថា ការរឹបអូសឈើគ្រញូង ប្រណីត ចំនួន៣តោនឈើអា ៦ម៉ែត្រគូប។

សម្រាប់ឈើ ទាំងអស់នេះ ត្រូវបានកម្លាំងចម្រុះយក ទៅរក្សាទុកនៅទីស្នាក់ការរដ្ឋបាល​​ព្រៃឈើ ខេត្ដកំពត ដើម្បីចាត់ការបន្ដទៀត។ ដោយឡែកម្ចាស់​កន្លែងស្ដុកឈើខុសច្បាប់នេះ​បានរត់គេចខ្លួនបាត់។

គយ​ចល័ត​​ឆ្មក់ចាប់រថយន្ត​កាមរី​​2គ្រឿង​​ដឹក​ទំនិញ​​ក្លែង​បន្លំ​គុណភាព

មន្ត្រី​គយ​​ចល័ត​​ប្រចាំ​នៅ​ចំណុច​​ផ្សារ​កណ្តាល​ ក្នុង​ភូមិ​គីឡូ​ម៉ែត្រ​លេខ​៤ ​សង្កាត់​​ប៉ោយ​ប៉ែត ​បាន​ឆែក​ឆេរ​​ចាប់​បាន​​ពី​រថយន្ត​​កាមរី​២​គ្រឿង ​ដែល​ដឹក​​ ប​ង្កប់​​ជា​មួយ​ផ្លែ​ឈើ​​នៅ​ថ្ងៃ​ទី​២៧ មិថុនា។ ត្រី​ខ​គ្មាន​​ស្លាក​សញ្ញា​​ និង​ការវេច​ខ្ចប់​​ឱ្យ​បាន​​ត្រឹម​​ត្រូវ​ខូចគុណ​ភាព​​ចំនួន​៤១​​កេស ស្មើ​នឹង​១.៥៨៤​​កំប៉ុង ព្រម​ទាំង​សណ្តែក​ខៀវ​បំពង​ចំនួន​៣០​គីឡូ​ក្រាម។

លោក​គីវ ​គឹម​ផា មន្ត្រី​​ភ្នាក់ងារ​​គយ និង​​រដ្ឋា​ករ​​ ស្រាវជ្រាវ​ និង​បង្ក្រាប​​អំពើ​​រត់​ពន្ធ​នៃ​​ទីស្នាក់​ការ​គយ និង​រដ្ឋា​ករ​ប៉ោយប៉ែត បន្តថា ​ការ​ចាប់​បាន​​ទំនិញ​​ទាំងនេះ​គឺ​ខណៈ​កម្លាំង​​រ​បស់​លោក​​ពង្រឹង​ការ​ ត្រួត​ពិនិត្យ​​ទំនិញតាម​រថយន្ត​ ។ ទំនិញ​​ទាំងនេះ​មិន​ត្រឹម​តែ​គ្មាន​ស្លាកសញ្ញា ឬ​ការ​វេច​ខ្ចប់​​ឱ្យ​បាន​ត្រឹម​ត្រូវ​​នោះទេ ​ថែម​ទាំងគេ​​វាយ​ដាក់​កាល​បរិច្ឆេទ​​ហួស​កំណត់​​ការ​ប្រើ​ប្រាស់​​តាម​របៀប ​ក្លែង​​បន្លំ​ទៀត​​ផង ដូច​ជា​ត្រី​ខ​​ជាង​១​ពាន់​​កំប៉ុង​នេះ​ជាដើម​ ។

បន្ទាប់​​មក​​សមត្ថ​កិច្ច​បាន​​ឱ្យ​ពួកគេ​​ធ្វើ​កិច្ច​សន្យា​រួច​ឱ្យ​ត្រឡប់ ​​ទៅវិញ​ជា​មួ​យ​រថយន្ត​​​រៀង​ខ្លួន​ៗ។ ឯ​ទំនិញ​ទាំង​អស់​​​នោះ​ ​ក្រោយ​ធ្វើ​កំណត់​ហេតុ​រួច​​ក៏​​ប្រគល់​​ឱ្យ​មន្ត្រី​​កាំកុង​ត្រូល​​ចាត់​ ការ​បន្ត៕

ប្រជាពលរដ្ឋ​ នៅតំបន់ថ្ម​ដូន​ បាន​ត្រៀមជម្លៀស​​ចេញ ពី​ព្រំដែន​

មានពលរដ្ឋ​ជាច្រើនគ្រួសារ នៅ​ភូមិ​ថ្ម​ដូន តា​មាន់ នៅក្នុង​ឃុំ​គោក​មន​ ភូមិ​កុក​ធំ នៅក្នុង​ឃុំ​គោក​ខ្ពស់​ ភូមិ​ជប់​គគី ខាងកើត​និង​ខាងលិច នៅ​ឃុំ​អំពិល ស្រុក​បន្ទាយ​អំពិល និង​ភូមិ​មួយ​ចំនួនទៀត​ស្ថិត​​ក្នុង​សង្កាត់​សំរោង ក្រុង​សំរោង ខេត្តបន្ទាយ​មាន​ជ័យ ​បាន​ត្រៀម​របស់របរ​​​មា​ន​តម្លៃ​រួច​ជាស្រេច ព្រោះ​អី​កាលពី​​រត់​លើក​មុន​​ មិនបាន​យក​អ្វី​ជា​ដុំកំភួន​ឡើយ​។

តើមូលហេតុអ្វីខ្លះដែលនាំឲ្យ ពលរដ្ឋទាំងអស់នោះត្រៀមខ្លួន ចេញពីលំនៅឋាន មូលហេតុ​៖ ទី​១ពួកគាត់​បានទទួល​ដំណឹង​ពី​ពលរដ្ឋ​នៅតាម​ព្រំដែន​បានឲ្យ​​ចាក​ចេញ ព្រោះ​ភ័យខ្លាច​សឹកសង្គ្រាម​ ដែល​នឹង​អាច​មកដល់​នាពេល​ខាងមុខនេះ​។ ទី​២ទាហាន​ថៃ​នៅ​​តាម​ព្រំដែន​បានមក​ធ្វើ​យុទ្ធ​ដំណើរ​កងទ័ព​ និង​ហ្វឹកហាត់​ពលរដ្ឋ​ឲ្យ​​ចេះ​គេច​គ្រាប់​ និង​របៀប​ជួយ​ជម្លៀស​គ្នា​ក្នុងពេល​មាន​សង្គ្រាម​កើ​តឡើង​។

មួយវិញទៀតទី​៣ ទា​ហាន​ថៃ​បាន​ប្រាប់​ប្រជារាស្ត្រ​ ឲ្យ​ជីក​លេណដ្ឋាន​ថ្មី​ថែមទៀត​ និង​​ពួកគាត់​បានទទួល​ដំណឹង​ ពី​ពលរដ្ឋ​ថៃ​ថា មានគម្រោង​បញ្ជូន​ព្រះសង្ឃ​និង​យាយជី​ចូល​​មក​ប្រាសាទ​តា​ក្របី ។

បើកត្រាក់ទ័រ ភ្ជួរដី ជាន់មីនតោន ផ្ទុះស្លាប់ភ្លាមៗ

នៅថ្ងៃទី២៨ ខែមិថុនា ឆ្នាំ២០១១នេះ ស្ថិតនៅចំណុចថ្លុកសង្កែ ភូមិអូរត្រាវជូរ ឃុំសិរីមានជ័យ ស្រុកសំពៅលូន ខេត្ដបាត់ដំបង មានបុរសស៊ីឈ្នួល បើកត្រាក់ទ័រភ្ជួរដីម្នាក់ បានស្លាប់​ភ្លាមៗ​ នៅកន្លែងកើតហេតុ បន្ទាប់ពីជនរងគ្រោះ កំពុងតែបើក​ត្រាក់ទ័រ​ភ្ជួរដី ហើយ​​ក៏ជាន់មីនតោន​ផ្ទុះតែម្ដង។

ប្រភពព័ត៌មានពីសមត្ថកិច្ចបានឱ្យដឹងថា ជនរងគ្រោះខាងលើមាន​ឈ្មោះ សុន ស៊ឹម ភេទប្រុស អាយុ ៣៤ឆ្នាំ រស់នៅភូមិ​​អូរកណ្ដោល ឃុំសន្ដិភាព ស្រុកសំពៅលូន។​ ក្រោយកើត​ហេតុ ជនរង​គ្រោះ ត្រូវបានសាច់ញាតិ យកទៅធ្វើបុណ្យតាមប្រពៃណី៕

ហ៊ីយ៉ាន់ដាយ ដេកផ្ងារជើងទាំងព្រលឹម

ថ្ងៃទី២៨ ខែមិថុនា ឆ្នាំ២០១១​ មានរថយន្ដ​ហ៊ីយ៉ាន់ដាយមួយគ្រឿង ផ្ទុកស៊ីម៉ងត៍ប្រមាណជាង ៤០តោន បានដេកផ្ងារជើងទាំងព្រលឹម នៅចំណុច​ផ្លូវក្រាលក្រួសក្រហម ចេញពីផ្លូវជាតិលេខ៥៣ ចម្ងាយ ២០ម៉ែត្រ ភូមិត្រញំងគរ ឃុំជ្រៃបាក់ ស្រុក​រលាប្អៀរ ខេត្ដកំពង់ឆ្នាំង។

ប្រភពពីសមត្ថកិច្ចបានឱ្យដឹងថា អ្នកបើកបររថយន្ដ ឈ្មោះ ហួន បញ្ញា ភេទប្រុស អាយុ ៣៧ឆ្នាំ បើកបរ​ស៊ីឈ្នួលឱ្យក្រុមហ៊ុនស៊ីម៉ងត៍ ដឹកចេញពីប៉ោយ​ប៉ែត ហើយក៏ក្រឡាប់នៅកន្លែងកើតហេតុ​ខាង​លើ ដោយសារតែភ្លៀងរអិលខ្លាំងពេក និងដីជ្រាយ ប៉ុន្ដែមិនបណ្ដាលឱ្យនរណា​ម្នាក់ស្លាប់ និង​រង​របួស​​នោះទេ៕