លោក Marcelo Bielsa បាន​ធ្វើ​ឲ្យ​កីឡា​បាល់​ទាត់​បារាំង​​មាន​ការ​ភ្ញាក់​ផ្អើល​កាល​ពី​ថ្ងៃ​សៅរ៍ នៅ​ពេល​ដែល​រូប​លោក​បាន​​​លា​លែង​ពី​តំណែង​ក្នុង​នាម​ជា​គ្រូ​បង្វឹក​របស់​ក្លិប Marseille ត្រឹម​តែ​ប៉ុន្មាន​នាទី ក្រោយ​ពី​ក្រុម​របស់​លោក​បាន​រង​បរា​​ជ័យ​​ក្នុង​ការ​ប្រកួត​បើក​​រដូវ​កាល​ក្នុង​លទ្ធ​ផល ១-០ ក្នុង​ផ្ទះ​ខ្លួន​ឯង​ក្រោម​ស្នា​ដៃ​ក្រុម Caen​។ គ្រូ​បង្វឹក​​សញ្ជាតិ​អា​ហ្សង់​​ទីន​រូប​នេះ​បាន​ប្រកាស​ក្នុង​សន្និ​សីទ​សារ​ព័ត៌​មាន​បន្ទាប់​ពី​ការ​ប្រកួត​ថា៖ «ខ្ញុំ​បាន​​លា​លែង​ពី​តំណែង​របស់​ខ្ញុំ​ក្នុង​នាម​ជា​អ្នក​ចាត់​ការ​ទូទៅ​របស់ Marseille​»​​។ លោក Bielsa វ័យ​៦០​ឆ្នាំ ត្រូវ​បាន​ទាក់​ទង​ឲ្យ​​ទៅ​កាន់​តំណែង​ក្នុង​ក្រុម​ជម្រើស​ជាតិ​ម៉ិក​ស៊ិក​ក្នុង​រយៈ​ពេល​ប៉ុន្មាន​សប្តាហ៍​ថ្មី​ៗ​នេះ ហើយ​ក្លិប Marseille ហាក់​ដូច​ជា​​ជួប​បញ្ហា​ដោយ​សារ​តែ​ភាប​ស្រពេច​ស្រពិល​ជុំ​​វិញ​អនា​គត​របស់​​លោក​។

លោក Marcelo Bielsa

ភ្លាម​ៗ​ក្រោយ​ពី​​ការ​រង​បរា​ជ័យ​​ដ៏​ខក​ចិត្ត​របស់​ពួក​គេ លោក Bielsa ដែល​ទើប​តែ​បាន​ចូល​កាន់​តំណែង​នៅ​ឯ​​កីឡ​ដ្ឋាន Stade Velodrome កាល​ពី​ខែ​ឧស​ភា ឆ្នាំ​២០១៤ បាន​បង្កើត​ភាព​ភ្ញាក់​ផ្អើល​មួយ​ដែល​ប្រធាន​ក្រម Steve Mandanda ចាត់​ទុក​ថា «ជា​ការ​​ខក​ចិត្ត​ដ៏​ធំ​​របស់​លោក​»​។ គ្រូ​បង្វឹក​រូប​នេះ​ដែល​​ដឹក​នាំ​ឲ្យ Marseille បញ្ចប់​ក្នុង​ចំណាត់​ថ្នាក់​លេខ​​៤​នៅ​លើ​​តា​រាង​លីក Ligue 1 កាល​ពី​រដូវ​កាល​មុន បាន​ឲ្យ​ដឹង​ថា៖ «ខ្ញុំ​បាន​បញ្ចប់​ការ​ងារ​របស់​ខ្ញុំ​នៅ​ទី​នេះ ខ្ញុំ​នឹង​វិល​ទៅ​កាន់​ប្រទេស​របស់​ខ្ញុំ​វិញ​​»​។ ស្រប​ពេល​ជា​មួយ​គ្នា​នេះ Labrune បាន​ប្រកាស​ក្នុង​សេច​ក្តី​ថ្លែង​ការណ៍​មួយ​ដែល​ត្រូវ​បាន​ចេញ​ផ្សាយ​កាល​ពី​ថ្ងៃ​សៅរ៍​ថា៖ «ខ្ញុំ​​ពិត​ជា​ភ្ញាក់​ផ្អើល​យ៉ាង​ខ្លាំង​ដូច​ទៅ​នឹង​​អ្នក​គាំ​ទ្រ​ទាំង​អស់​ដែរ​​ចំពោះ​ការ​សម្រេច​ចិត្ត​របស់​លោក Marcelo Bielsa​»​៕

 

ប្រភព​ព័ត៌​មាន៖ Channel News Asia


បញ្ចេញមតិរបស់លោកអ្នកដើម្បីកែលម្អ និងចែករំលែកចំណេះដឹងដល់បណ្តាញសង្គមខ្មែរយើង ។